يا قلب أنا كنت قايلك تبت من تعب السفر
ومن مخاواة القماري ومن شراب موية المطر
تاريك كامن ليا بشيتآ كتر
تاريك لابد ليا بشيتآ كتر
ما زمان أنا وإنت لفينا المواني
بالقطارات والمطارات والسفن
ودقينا أجراس الجديد
وعدنا ترتيب المعاني
الليلة راجع لي تبقبق
بتنتل الآهة وترقرق
زي تقول يا داب عرفت الاندهاش
يا قليب مالك عليا
ما إنت عارف نقطة الضعف القديمة
وزيي ضايق الإرتعاش
يا قليب ياما سرحنا
مرة جينا وألف رحنا
ومرة شاي عصرية في طرف الغمامة
ومرة دوبيت للمحنة
ومرة منديل مسقي حنة
ومرة حاجاتا أجن
وإنحناءات للحمامة
جاي تسألني الدبارة
يا قليب ما فيش دبارة
لا المراكب قادرة تكسح في النزيف
ولا نحن شايفين الفنارة
