بنات كتير كده من سنى
بيغيروا منى وبيحسدونى مع إنى
مش أحلى منهم بصراحه
لا عندى لبس أخر موضه
ولا فى الأوضه
صوره لنجم عنيه سوده
ورموشه ساحره وجراحه
ولا ف كلامى بتصنع ولا بدلع
ولا عمرى أوعد وأطمع
ولا أدى أدم تفاحه
أصل الحقيقه من صغرى
جد ودغرى
لو حد قالى كلام مغرى
أطير بقلبى سواحه
وأهرب من النظره إن طالت
وإن عينى مالت
ببص م البعد التالت
ألاقى فيه كل الراحه
مش معنى كده مش طبيعيه
أو رجعيه
بصراحه أوى متوعيه
م أنا أمى أصلها فلاحه
