يا صياد الطيور يا خالي
صباعك عن زناد الموت
انا عصفور ضعيف الحال ,, ولا اكفيش لعيالك قوت
انا العصفور وليف الخضرة والمية ,, انا المولود على كفوف الجناينية
بقول تغريد نغمها شديد ,, قريب وبعيد ,, ياخدني الشوق على جناحه وابقى وحيد
لاعود تاني لا انا حيران ,, ولا فرحان ,, ولا محزون ,, ولا بشبع غنى وألحان
ولا بحكي مع النسمة ولا بشكي من القسمة
ولما الدنيا تبكيني هقول دي مصيرها مبتسمة
اديلي سنين على ده الحال بقاسي المر والبطال
بشوف الصقر فارد في الهوا باعه وأتباعه نشرهم في الفضا جاعوا
طيور تانيين صغار مساكين جواعى لكن لا هم نايمين ولا صاحيين
عشان نابه ومخلابه بشوف الكل أحبابه
عشان نابه ومخلابه تلاقي الكل أحبابه
ودنيا تخاف من القوة ,, وجو الدنيا مش هوا
أشوف بلبل غريب في الدوح بيرقص رقصة المدبوح
بهفة ريح سقط عشه وفين حيروووح ..
واديني سنين على ده الحال بقاسي المر والبطال
يا صياد الطيور يا خالي
يا صياد الطيور حافظ على الخرطوش
ده مية عصفور كمان قدي ما يستاهلوش
حداك الصقر لو تضرب على وكره تلاقي لحم متكوم ولا بياكلوش
طاوعني ارميها من ايدك ,, طاوع وارجع
هزيل لحمي لا حيفيدك ولا ينفع
شوفلك طير تاني ,, واعيش انا مرتاح البااال
