نكر صوتك صداك
غالطتنى الزمن فيك
شهرت على الجفاف
وعدك ، بطاقاتنا الخريفية
رجع فاضى الكلام مليان
معاكى اتبرجت غيمة
وشهق جواي صوت جدول
مرقت على المطر حفيان
لقيتك
والرزاز مدخل
وناديتك -
اقيفي معاي
نشيل كتف الغناء الميّل
ونتخيّل
حلم دونك بيتحقق!!
وقبلك خيل دماي واقفه على
شرياني تتشهق!
وعرف صوتك صداك، غنيتي
رشحّت حلقك لي اذاعات الشجر
والمنتظر من عودة المدعو
المطر
للمسادير ، والطنابيير
واللسة في رحم القصيد
والدابو حسّ
وفي سوق عكاظ ،
وبين مزادات الحروف
غيَّبت رسمك واحتكرتك للظروف
للزمان الجايى ، واللحظة
الى فاتت منى هسه
يا واقفة بين جرح السحاب
وبين شهقة الأرض البكر
ما كان ده ريد
كان احتمال
تغيير قوانيين حركتك
ما بين حديثنا ولحظة الفعل الحقيقى
وانتباهك انتي
للشارع البيرجع تاني لنقطة بدايتو
وانحيازك انتي للشارع البيرشح
من مسام رملو التوقع
وما اتعرف قانون نهايتو
غايتو
امشى
فى الدرب البطابق
فيهو خطوك صوت حوافرك
يا فرس
كل القببيلة تلجموا.. يكسر
قناعاتها ويفر
يسكن مع البدو في الخلاء
ما يرضى غير الريح
تجادلو وتقنعوا
