الفيلم اللى احنا الان هنسمع الاغاني بتاعته هو فيلم رصاصه فى القلب والفيلم ده له ذكريات خاصه بيا لانه جمعني فى بيت واحد مع اصدقاء اعزاء على نفسي هما الاستاذ توفيق الحكيم والاستاذ نجيب الريحاني والاستاذ كامل الشناوي
لاني انا كنت ساكن فى حته اسمها العباسيه وهي قريبه من الصحراء وكنا فى اثناء الحرب سنه 42 او 43 وكان الالمان والطلاينه باستمرار يضربو الجيوش والعتاد الموجود فى هذه الصحراء وانا كان بيتي جنب الصحراء فكنت باستمرار مضطر بمجرد ما تضرب صفارات الانذار اني انزل تحت خالص وانا بيتي كله تلات ادوار فتعبت من النزول باستمرار تحت وبالشمع ومش عارف ايه فقلت اتنقل فى عماره تكون طويله جدا مكونه من اتناشر دور واسكن فى اول او تاني دور بحيث القنبله لما تقع من فوق يبقى حتاخد ست سبع ادوار تكون نزلت خفيفه عليا .. وسكنت فعلا فى تاني دور ولقيت بالصدفه الجميله انه نجيب الريحاني ساكن وعلى بعد خطوات فى بنسيون ساكن توفيق الحكيم وكامل الشناوي وكان يوميها رئيس تحرير للاهرام فكنا بنقعد ففكرنا فى هذه الروايه وقلت لتوفيق الحكيم اعملي الروايه وتعملي حوار جديد لهذه الروايه لان هذه الروايه كانت طلعت فى كتاب للروايات القصيره فلازم تبقى دي عاوزه بقى تتفرش لمده ساعتين فلازم تعملي بقى حوار اخر وانت بقى مساله الاغاني دي بقى انت اللى تقرر تتحط فين وانا عاوز اعمل حاجه جديده يا توفيق حاجه تقريبا زي الاوبريت وانا هختار مواقف بحيث انها لو اتشالت من الروايه يختل السياق بتاعها فحطيت ايدي على موقفين ازاي عبد الوهاب شاف البنت اللى عجبته وازاي صرحلها بهذا وعرفت انه شافها ساعه ما كنت بتاكل جلاس وتدوب فى قلوب الناس واخترته علشان اعمل حكيم عيون المعروفه وجيت فى موقف تاني اللى هوه الموقف اللى كانت البنت محتاره فيه طيب انا بظهر اعجابي وحبي لهذا الشخص وهوه ليه بيهرب مني مهيش عارفه تحط ايدها على السبب بشكل قاطع لغايه الدايلوج اللى بيني وبينها اللى هوه بيبتدي بقولي شيء عن احوالك وهوه يقولها اقولك ايه عن احوالي ويتعرف من هذا الديالوج ان انا بحبها فعلا وانها تكتشف ان هوه مش راضي يعني يمشي فى طريق هذا الحب لانه خطيبه لصديقه وان هوه شخصيته وضميره يأبي عليه بانه هوه يخطف واحده من خطيبها الموقفين دول يلاحظ ان انا اتكلمت فيهم وعلى عهده توفيق ان لاول مره فى العالم حصل ان واحد يعمل اغنيه يتكلم شويه ويغني شويه او ساعه ما يتكلم يكون فى موسيقي مصاحبه ليه ويرجع يغني ويرجع يتكلم ..
اول اغنيه هنصادفها هي اغنيه انسى الدنيا المفروض انها اغنيه مرحه وهي من تاليف الاستاذ مامون الشناوي في هذه الاغنيه شطرتين من احب الجمل لدي اول مره ادخل الجيتار فى اغنيه وساميه جمال فى حته من الحتت وهي كانت من الفتيات اللى حواليا خدت مخدهوضربت عليها طلع صوت جيتار وفضلت مع الزمن ادخل الجيتار لغايه ما بقى اله اساسيه فى الفرق الغنائيه وفى الغناء العربي
انسى الدنيا و ريح بالك
و اوعى تفكر فى اللى جرالك
انسى الدنيا ياللى دموعك لحبايبك
قولى ابتسامتك تبقى لمين
اوعى الغرام يشغل قلبك
ده لسه فيه فى العمر سنين
مين الهنا يبقى اصاده و تشغله عنه همومه
يا عاشق الليل لسواده فايت لمين عشق النجوم
ليه تشغل بالك مين يرحم حالك
كل اللى احبه حواليه
مين زى فى الدنيا اتهنى
حتى النجوم ملك ايديا
ادى النعيم ادى الجنه
دوق الجمال و اتمتع بيه
من قبل ما يدبل و يذول
و اوعى يفوت يوم تحزن فيه
و اسهر ده بكره النوم حيطول
ليه تشغل بالك مين يرحم حالك
